انا النهاردة جايبالكوا طريقة للشاورما اللحمة انما اية ...حكااااااااااااية هى زى بتاعت برة واحسن منها كمان
المقادير:
نص كيلو لحمة
طماطماية كبيرة
بصلاية كبيرة اوى
معلقتين خل
لمونة
معلقتين زيت
ملح
فلفل
زعتر ناشف
جنزبيل مطحون
نص معلقة سكر صغيرة
بهارات لحمة
للساندوتش:
طمطماية_فلفلاية_بصلاية_بقدونس مفروم_سلطة طحينة مخلل خيار بطاطس محمرة
الطريقة:
نجيب الخلاط ونحط فية كل المقادير ماعدا الملح ونضربة فى الخلاط كويس وهيطلع لنا الخليط لونة زى اللون الزهرى كدة ,نصفية ونحطة على اللحمة الى احنا مقطعنها شرايح صغيرة زى شرايح الشاورما,ونحطة فى كيس فى التلاجة لمدة ساعتين تلاتة اربعة ,كل مايعد كل مايكون احسن,وبعدين لما نطلع الكيس من التلاجة نفرغ الى فية ونحطة فى طاسة من غير سمن ولا حاجة واول مايغلى نوطى النار وكل مايحتاج ماية نزودلة ماية ,لحد قبل مايستوى بشوية نحط الملح لان الملح فى الاول مش بيخلى اللحمة تستوى بسرعة ,ولما تستوى اللحمة خالص نقطع طماطماية وفلفلاية صغير وبصلاية جوانح ونحطها على اللحمة ونطفى النار فى ساعتها ونحط البقدونس والنار مطفية
بعد كدة نجيب ساندوتشات زى ما تحبوا كايزر او فينوا او بلدى وانا جربتها فى الفينو كانت هااااااااايلة جدا ,المهم تحطوا الشاورما فى العيش وعليها معلقة سلطة الطحينة وجمبها مخلل خيار وبطاطس محمرة ودوس يامعلم .. والله هتدعولى
السبت أكتوبر 16, 2010 10:12 am
