القصة لذيذة وتضحك وارجو من الجميع الاشتراك لاكمالها
اولا المقدمة
بسم الله و الحمد لله و الصلاة و السلام على رسول الله صلى الله عليه و سلم
أحبتى و إخوتى اعضاء المنتدى الكرام
أضع بين يديكم قصة شاب موجود فى كل بيت مصرى الآن
تعالوا لما اعرفكم على الابطال
الوالد...(العاشق الولهان )
الابن...(the big heart )....وده اللى معاه الحكايه
الاخ..(kore2100)
زميله....(vip)
__________________________________________________ ______
-----------------------------------------------------------------------------------------------------
المشهد الاول
يدخل الأب إلى حجرة ولده ليوقظه للذهاب إلى الجامعة يدبدب على ظهره
العاشق الولهان : محمد ... محمد .... قوم يا حبيبى
فيفتح الولد عيناً واحدة ينظر بها إلى أبيه فى استغراب و كأن أباه قد انتهك مقدساً أو تهرطق
the big heart : إيه يا بابا فيه إيه ؟
العاشق الولهان : قوم يا حبيبى عشان تلحق تروح كليتك ؟
the big heart : يا بابا كلية إيه اللى بتصحينى عشانها وش الفجر
العاشق الولهان : وش الفجر إيه بس... يا بنى الساعة داخلة على عشرة ... قوم يا حبيبى عشان
تلحق محاضراتك
the big heart : يابابا نفض
العاشق الولهان : أعمل إيه
the big heart : يعنى كبر يا بابا
العاشق الولهان : الله أكبر
the big heart : لا يا بابا مش قصدى ... أن بقولك كبر دماغك يعنى
العاشق الولهان: يا ابنى قوم متتعبنيش .... مش انت عندك محاضرات مهمة النهاردة ؟
the big heart : يا بابا مهمة إيه بس ... ده كله فى الكلتشة
العاشق ( متعجباً ) : يعنى إيه كلتشة يا بنى .... انت مش عندك محاضرات مهمة النهاردة
the big heart : يا بابا ... فكك من كلام الستينات ده.... أنا مش قادر أفك رموز
وشى
العاشق الولهان : يا بنى قوم أخوك بيقول ان المحاضرات النهاردة عندك مهمة
the big heart : يابابا سيبك منه ... ده واد بيهيس
العاشق الولهان : يعنى إيه .... كلامه صح ولا غلط ؟
the big heart : يا بابا ... ابنك ده دماغه مخرومة ... عمالة تنقط .... متسمعلوش و لما
يكلمك سد ودانك لحسن ياكلها .... و الودان اليومين دول غالية يابابا ... ملهاش قطع غيار
العاشق الولهان : يا بنى انت بتتكلم كده ليه ؟
the big heart : يعنى بكلمك بالسيم يعنى .... بص يا بابا عشان خاطر ربنا ... سيبنى
أنام كمان خمس ست ساعات عشان أقوم فايق .... أنا كنت سهران طول الليل ... سيبنى أأنتخ شوية
العاشق الولهان : تأنتخ ؟!! ... الله يخرب بيتك مش فاهم منك ولا كلمة لا انت و لا أخوك
the big heart : و الله يابابا أنا تعبان خالص و مش قادر ... سيبنى
العاشق الولهان : يا بنى كلمنى زى ما بكلمك ... إيه اللى انت بتقوله ده
the big heart : يا بابا هو انت عشان صاحى بدرى لازم تصحينى أنا كمان بدرى ،سيبنى يا
بابا أنا عارف مصلحتى .
العاشق الولهان : مصلحتك ؟ يا بنى انت بقالك ثلاث سنين فى سنة ثانية
the big heart : ظلم يا بابا ، الدكاترة بتاعة الكلية حاطينى فى دماغهم لحد ما عفنت
العاشق الولهان : (وقد بدأ يغتاظ ) طيب قوم يا معفن ... خد لك دوش و افطر و روح الكلية
the big heart : بابا.. اقفل النور و خد الباب وراك .... و أما أقوم نبقى نشوف
موضوع الدش ده
العاشق ( بصوت مرتفع ) : أنت حتقوم و لا حقومك بالجزمة
the big heart ( يجلس على السرير ) : يا فتاح يا عليم .... الواحد لسة معملش
استمورننج و بيتهزأ على الصبح
يخرج الاب(العاشق) و يدخل أخوه.....kore2100 فينظر إليه شذراً
the big heart : لازم تديها جاز على الصبح .... شعللتها ؟ ... ماشى
kore2100 : هو اللى بيسألنى
the big heart : قوله معرفش ... قوله معندوش زفت محاضرات
kore2100 : أكذب يعنى ؟
the big heart : (يضحك سخرية ).... لأ إنت متعرفش تكدب ... تحب أقوله انك
ساقط ، و منجحتش زى ما قلتله و انك بتعيد السنة من غير ما تعرفه ؟
kore2100 : ( و قد اصفر وجهه ) لا يا محمد اوعى ....
the big heart : طيب يا حلو .... روح هاتلى سجارة من علبة أبوك أعمل بيها دماغ
الصباحية
kore2100 : ( يخرج سيجارتين من جيبه ) خد اثنين أهم ... بس اخلص بسرعة قبل ما
ييجى تانى .
the big heart : طيب يا إتم .... اختفى من قدامى دلوقت
يخرج ،kore2100 و يبدأ محمد فى تدخين إحدى السجائر و هو بعد ما زال على السرير
ثم ينظر بجواره على الكمودينو و يتناول التليفون و يتصل بأحد زملائه
the big heart : ألو ... أيوه يا vip.... انت لسة مِكَّحول ... ما تقوم ياواد خليك
نشيط
vip : يا بنى حد يتصل بحد دلوقت مفيش زوق .... الساعة لسة عشرة و نص
the big heart : فوق بقى .... إيه النظام ؟ الحياة أخبارها إيه النهاردة ؟
vip : زى امبارح .... نروح المول ... و ندخل الكافى شوب .... نطلب شيشة ... نشرب لنا
كام ستون ..... نعلق حتتين طراى .... أو نلف نعاكس فى المزز
the big heart : طيب نتقابل الساعة واحدة .... متحلقليش
vip : حتعمل إيه دلوقت
the big heart : أنا حاخلع من البيت دلوقت و اخرج أصيع لحد ما نتقابل ، عشان أبويا
عاملى فيها أبو الغضب و الأشكيف ... و لو فضلت موجود حيعملى فيها بروسلى و يضربنى .
vip : الحمد لله يا عم... أنا أبويا ميت
the big heart : يا بختك ... استكانيس براحتك ..... طول عمرك محظوظ .... شاو
يغلق الخط ... و يدخل أخوه kore2100
kore2100 : اوعى يا محمد تقول لابوك .... لحسن يرحلنى
the big heart : (ينظر إليه بتعال و كأنه ملك روحه ) خليك حلو معايا أحسنلك ...
لحسن أنا لسانى بياكلنى ... و الندالة بتنقح على
kore2100 : ( باستجداء ) اوعى يا محمد
the big heart : طيب روح هاتلى الجل بتاعك ... عشان الجل بتاعى بياكل فى دماغى زى
مية النار
kore2100 : احنا حنبدأ استغلال .... و بعدين انت اللى مابتغسلش دماغك لحد ما باظت
the big heart : خلص يا عم الأمور ... روح هاتى الجل .... إنجز
kore2100 : يا محمد ما انت عندك إزازة لسة مفتحتهاش
the big heart : ياد روح هاتها متبقاش إيحة ... و بعدين انت لابس فانلة فى البرد ده ...
عاملى فيها هركليز
kore2100 : ( يصرخ و هو يجرى خارج الحجرة ) يا نهار اسود ... دا المكوة على القميص
يأخذ محمد نفساً من السيجارة و قبل أن يخرجه من صدره يدخل والعاشق الولهان
العاشق الولهان : إنت لسة نايم ؟
the big heart : ( لا يرد حتى لا يخرج الدخان من فمه فيراه أبوه و يخفى السجارة تحت
البطانية )
العاشق الولهان : يعنى مش عايز تجيبها لبر .... آدى آخرة دلع أمك . هى اللى فسدتك ... لو
مخرجتش من البيت و رحت كليتك حالاً حكسر دماغك دى ... إنت فاهم ؟
the big heart : ينظر إلى والده و قد احمرت عيناه و انتفخ وجهه
العاشق الولهان : انت بتبص كده ليه يا واد انت .... جتك البلا فى منظرك
( يخرج العاشق )
the big heart : ( يخرج نفسه الذى كتمه حتى كاد أن يموت ، و يسعل بشده )
يدخل kore2100 أخوه فيجده على هذه الحال
kore2100 : إيه مالك ؟ حتفطس ولا إيه
the big heart : روح هاتلى كباية مية أبوك كان حيموتنى .... كنت حسافر
يخرجkore2100 فيستلقى على السرير يسترجع أنفاسه و يغمض عينيه ... و بعد قليل يرتفع صوت شخيره .
------------------
إلى اللقاء مع المشهد الثانى
المشهد التانى
الساعة تجاوزت الثانية عشر ظهراً
العاشق جالس فى حجرة المعيشة يقرأ الجريدة ، و انجيل فى
المطبخ تعد الشاى
محمد يخرج من حجرته يرتدى بنطلون جينز ساقط من على
وسطه و يلبس قميص يلتصق بجسده بشدة ، و بينه و بين البنطلون فراغ
و يفتح ثلاثة أزرار مبيناً سلسة كبيرة تنتهى بقطعة
فضيئة دائرية مرسوم عليها جمجمة ، شعره مرفوع من
الجانبين إلى الوسط على هيئة هرم و يلمع لمعاناً شديداً بسبب
الجل ، حذائه أصفر اللون بكعب عال ، و يمسك فى يده
الموبايل و سماعته فى أذنه و يشغل عليه أغنية أجنبية لا يفهم
معانى كلماتها ، و على عينيه نظارة عريضة جداً لونها بنى ،
و فى يده ساعة شديدة الضخامة و فى يده الأخرى حظاظة
نحاسية عريضة
العاشق الولهان( حين يراه) : لسة خارج ... بقالك ساعتين بتزوق ؟
the big heart ( يغمغم ) : أف .... اصطبحنا بقى
يدخل محمد المطبخ لأمه الطيبة و هى تعد الشاى
the big heart : إيه يا حاجة
AnGeL_SweeT : لسة صاحى ؟ أبوك عمال ينفخ برة
the big heart ( بضيق ) : ما هو اللى مصحينى بدرى
AnGeL_SweeT : بيصحيك عشان تروح الكلية
the big heart : هو يوم الأجازة بتاعه كدة .... لازم
ينكد علينا
AnGeL_SweeT : وطى صوتك ... عيب كدة
the big heart : طيب انجزى بقى .... هاتى المصلحة
اللى قلتلك عليها امبارح
AnGeL_SweeT ( بطيبة ) : مصلحة إيه
the big heart : إيه يا ماما إنت نسيتى و لا إيه ؟ ....
فين الاربعين جنيه بتوع الكتاب ؟
AnGeL_SweeT : يا واد بطل كدب .... كتاب إيه اللى
حتشتريه باربعين جنيه
the big heart : جرى إيه يا ماما .... احنا لسة حنتكلم
فى الموضوع ده تانى .... مش انت امبارح قلتى لى ماشى ؟
AnGeL_SweeT : لا أنا قلت حاقول لأبوك
the big heart : يا دى النيلة ... انت لسة حاتقولى له ؟
العاشق الولهان (من الخارج ينادى على الأم ): إيه يا أم محمد
انت بتعملى الشاى على الشمعة ولا إيه ؟
AnGeL_SweeT ( تصب الشاى ) : أيو خلاص أنا
جاية
the big heart (يمسك بذراع أمه ): بقولك إيه يا ماما
الكتاب ده مهم .... متضيعوش مستقبلى ... حاولى تقصيهم من
بابا بسرعة عشان ألحق المحاضرة بتاعتى
يخرجان إلى حجرة المعيشة حيث العاشق ما زال مسكاً
بالجريدة ، فتضع الأم كوب الشاى أمامه و تجلس ، و محمد
يقف أمامهما
ينظر إليه العاشق بقرف شديد ، و يعود إلى الجريدة مرة ثانية
، فيطأطئ محمد فى ضيق و ينفخ فى نفاد صبر و يشير
لأمه كلميه
AnGeL_SweeT : بقولك إيه يا أبو محمد
العاشق الولهان : خير
AnGeL_SweeT : محمد كان عاوز فلوس يشترى بيهم كتاب
ينزل الأب الجريدة و ينظر إلى محمد من فوق لتحت
العاشق الولهان : كتاب إيه ؟ انت مش اشتريت كل الكتب ؟
the big heart : كتاب التكاليف
العاشق الولهان : طيب ما انت عندك كتاب التكاليف
the big heart : يا بابا ده بتاع السنة اللى فاتت .....
المنهج اتغير
العاشق الولهان : و ده بكام ان شاء الله
the big heart : باربعين جنيه
العاشق الولهان ( صارخاً ) : كام ... أربعين جنيه .... ليه
the big heart : يا بابا أنا مالى ... الكلية أسعارها غالية
العاشق الولهان : و أجيبلك منين الأربعين جنيه دول ان شاء
الله ؟ إحنا فى آخر الشهر
the big heart : أعمل إيه يا بابا....... أسقط يعنى ؟
العاشق الولهان : لا ... العفو ... و انت وش كده؟
the big heart : أيوه .... سمعنى الكلام بتاعك ده كل
مرة أقولك فيها على فلوس
العاشق الولهان: يابنى أربعين جنيه فى الكتاب كتير ....
صَوَّرُه ... إعمل زيى ... عمرى ما اشتريت كتاب فى
الجامعة
the big heart : يابابا انت بكالريوس تجارة أصلاً .
العاشق الولهان : و لو ... عمرى ما اشتريت كتاب
the big heart : و بعدين الدكتور منزل معاه ملزمة لازم
نملاها و نرجعها له تانى ، و مانع التصوير
العاشق الولهان : الله يخرب بيتك على يخرب بيت الدكتور ...
حجيبلك منين أربعين جنيه دلوقتى
the big heart : أمال بتصحينى ليه ؟ ... ما كنت تسيبنى
نايم .... حاروح الجامعة أعمل إيه دلوقتى
AnGeL_SweeT ( تحاول أن تهدئ الموقف كالعادة ):
خلاص يا أبو محمد أنا معايا ثلاثين جنيه بتوع عدسة النظارة
بتاعتى ... أصلحها الشهر الجاى و خلاص .... إديله عليهم
عشرة جنيه و خليه يشترى الكتاب
العاشق الولهان : ده كلام ؟.... بقالك أربع شهور تأجلى فى
النظارة ... و انت عارفة إن مفيش كتاب و لا حاجة
the big heart : و المصحف الشريف و عزة جلال الله
فيه كتاب
يخرج العاشق من جيبه عشرة جنيهات و يمد له يده بها ،
يقترب محمد من أبيه فيشم الأب رائحة شعره فيشمئز منها
العاشق الولهان: إيه ده ... إنت ريحتك وحشة كدة ليه ... إنت
حاطط سمنة فى راسك و لا إيه؟
the big heart : سمنة إيه يا بابا... ده الجل بتاع الواد
kore2100 بس طلع حمضان
العاشق الولهان : ( باشمئزاز ) إنسان مقرف .... أنا عارف
بيدخلوك الجامعة إزاى ؟
the big heart: يابابا هو انت كل ما تشوفنى تطلع فيه
القطط الفطسانة
AnGeL_SweeT : شباب يا أبو محمد ... بكره ربنا
يهديهم
العاشق الولهان : مش شايفة لا بس زى الرقاصة إزاى ؟
the big heart ( بضيق ): هاتى ياماما الفلوس خلينى
أخلص
العاشق الولهان : اسمع .... أما تيجى تورينى الكتاب أبو أربعين
جنيه ده ... فاهم ؟
the big heart : يحيينا و يحيك ربنا
ينظر له الأب شذراً ، فى حين تضحك الأم و تذهب إلى
حجرتها لتحضر له باقى المبلغ و هو فى إثرها
يخرج kore2100و قد لبس شبيهاً بأخيه ، و يذهب إلى
والده الذى أمسك بكوب الشاى و هم أن يشرب
kore2100 : بابا .... عاوز أربعين جنيه أشترى بيهم كتاب
مسكين kore2100.... الشاى كان ساخناً جداً
واللى اللقاء فى المشهد القادم بأذن الله
نشوف بقى بعد كده ايه هيحصل
الثلاثاء سبتمبر 28, 2010 11:58 am